ဖယောင်းတိုင်တစ်ထုပ်

အလွန် သက်တောင့်သက်သာရှိလှသော မွေ့ရာတစ်ခုပေါ် ရောက်နေမှန်း သတိထားမိ၏။ သူ၏ညာဘက်ပါးပြင်နှင့် နဖူးသည် စပ်ဖျဉ်းဖျဉ်း နာကျင်လျက်ရှိသည်။ မျက်လုံးများကို အားယူဖွင့်ကြည့်တော့ စူးရှရှလျပ်စစ်မီးရောင်ကို သူမြင်တွေ့ရပြီး ချက်ချင်းပင် ပြန်မှိတ်ထား လိုက်ရသည်။ ငါ့သားမထနဲ့နော်ဟု အနား၌ ထိုင်နေဟန်ရှိသော သူ၏ အမေက ရင်ခေါင်းသံဖြင့်ပြော၏။ နေ့လည်ခင်းတုန်းကတော့ အမေသည် သူ့အားဖယောင်းတိုင်  ရောင်းသောဆိုင်သို့ ဖယောင်းတိုင် အ၀ယ်ခိုင်းခဲ့ သည်။ အဖေက သူ့အား ဖယောင်းတိုင်တစ်ထုပ်ဝယ်ရန် ငွေနှစ်ဆယ် ပေးခဲ့၏။
လွန်ခဲ့သည့်တစ်ရက်က အဖေသည် အလုပ်သွားအလုပ်ပြန် လိုင်းကားစီးရသည်ကို ညည်းညူနေခဲ့၏။ လိုင်းကားက လူကျပ်သည်။ အချိန်ကုန်သည်ဟု အဖေဆို၏။ အဖေသည် ၀င်ငွေမကောင်းသော အလုပ်တစ်ခုကို လုပ်၏။ အဖေငယ်ငယ်က ကျောင်းမနေခဲ့ရဟု သူထင် သည်။ အဖေ စာအုပ်ဖတ်သည်ကို သူမမြင်ဖူးခဲ့။ သို့သော် အမေနှင့်တော့ အဖေညားခဲ့သည်။ အဖေ့ဝင်ငွေမှာ မိသားစုမလောက်ငှဟု အမေပြောခဲ့ ဖူး၏။ သို့တိုင် သူ့အထက် အစ်မနှစ်ယောက်၊ သူ့အောက်က ညီငယ်နှစ် ယောက်တော့ လူဖြစ်မြောက်ခဲ့ပြီ။ မမကြီးသည် လေးတန်းသာအောင်၏။ မမငယ်က သုံးတန်းနှစ်ကတည်းက ကျောင်းမနေတော့ပေ။ သူသည် မနှစ်က ငါးတန်းအောင်ခဲ့ပြီ။ အမေကတော့ သူ့ကို ကျောင်းဆက်မထားနိုင် တော့ဟု ဆိုခဲ့သည်။ သို့သော် နေ့လည်ခင်းကတော့ အမေသည် သူ့ အား ဖယောင်းတိုင်အ၀ယ်ခိုင်းခဲ့၏။ အဖေက သူ့အား ဖယောင်းတိုင် တစ်ထုပ်ဝယ်ရန် ငွေနှစ်ဆယ်ပေးခဲ့သည်။ ဆယ့်ငါးကျပ်တန်တစ်ရွက် နှင့် တစ်ကျပ်တန် ငါးရွက်။ ဒီနေ့ည မီးပျက်မည်ဟု အဖေကပြောသည်။
ငါ့သား ဆာနေပလား၊ ပန်းသီးတွေရှိတယ်။ ဆာရင်စားဟု အမေ ကဆို၏။ သူ ပန်းသီးကောင်းကောင်း မစားဖူးပေ။ မျက်လုံးထပ်မံ ဖွင့်ကြည့်သည်။ ညာဘက်မျက်စပ်က နာကျင်သွား၏။ နာသလား ငါ့သားဟု အမေက အလွန်ဝမ်းနည်းမှု ရောစွက်နေသော အသံမျိုးဖြင့် ပြောသည်။ သူသည် အမေ၏ မျက်နှာကို လျပ်စစ်မီးရောင်အောက်တွင်ေ၀၀ါးစွာ မြင်ရ၏။ အမေသည် သူ့အတွက် သိပ်စိုးရိမ်ပူပန်နေပုံရသည်။ အမေသည် သူ့ထက်ညီငယ်နှစ်ယောက်ကိုသာ အမြဲအသာပေးတတ်ခဲ့၏။ ခုတော့ အမေသည် သူ့အားပိုမိုဂရုစိုက်လာသည်ထင်၏။ မနာပါဘူးဟု အားယူပြုံး၍ သူပြောလိုက်သည်။
သူ့အနားတွင် လူတွေဝိုင်းနေ၏။ အမေမှလွဲ၍ အားလုံးမှာ သူမသိသူတွေချည်းဖြစ်၏။ သူတို့မှာ ဖြူစင်သောအသားအရေ၊ အလွန် တောက်ပသော အ၀တ်အစားကိုယ်စီဖြင့် ကြည့်လို့ကောင်းလှသည်။ အမေသည် ထိုသူများအကြားတွင် အလွန်အသားမည်းလှသည်ထင်ရ၏။ အမေသည် ပွဲနေပွဲထိုင် အ၀တ်အစားများကို ၀တ်ထားသည်။ သို့သော် အမေ့ဘေးမှ မိန်းမကြီးလောက်တော့ သန့်ရှင်းချောမောမှုမရှိ။ အမေ့တွင် ရွှေဆွဲကြိုးမရှိ။ ရွှေလက်ကောက်မရှိ။ ထိုမိန်းမကြီးမှာ ရွှေများအိနေသည်။ အမေသည် သူ့အား အိုဗာတင်းသောက်မလားဟုမေးသည်။ သူ အံ့အား သင့်သွား၏။ အိုဗာတင်းကိုလည်း သူမသောက်ဖူးပေ။ အိုဗာတင်းက ချိုရင်တော့ကောင်းမယ်ဟု သူတွေးသည်။ သူ့အာခေါင်မှာ ခြောက်သွေ့နေ သည်။ သောက်မလို့နဲ့တူတယ်ဟု ရွှေများအိနေသည့် မိန်းမကြီးက ညင်သာစွာပြောသည်။
အမေက သူ့နှုတ်ခမ်းဝသို့ ကြွေပန်းကန်လှလှတစ်လုံး တိုးပေး လာသည်။ အမေ့မျက်နှာက ကြည်လင်နေသည်။ အမေသည် သူ့အား လမ်းထိပ်က လက်ဖက်ရည်သောက်ရန်ပင် အမြဲကြည်ဖြူသူမဟုတ်ခဲ့။ နင်က ၀င်ငွေရှိလို့လားဟု အမြဲမေးတတ်ခဲ့၏။ အမေသည် အိမ်ထောင်မှု များနှင့် အမြဲမသာမယာရှိတတ်ခဲ့၏။ မီးသွေးကုန်ရင် စိတ်ထိခိုက်ပြီး ငေးငိုင်နေတတ်၏။ ဈေးဖိုးမရှိလျင် တစ်ယောက်တည်း ဗျစ်တောက် ဗျစ်တောက်လုပ်တတ်၏။ နေ့လည်ခင်းတုန်းကတော့ သူသည် ဖယောင်း တိုင်ဝယ်ရန် ဖယောင်တိုင်ဖိုးရခဲ့၏။ ဆယ့်ငါးကျပ်တန်တစ်ရွက်နှင့် ကျပ်တန်ငါးရွက်။ ဒီနေ့ည မီးပျက်မည်ဟု အဖေကပြောသည်။ ငွေနှစ်ဆယ် အား သူ့ဘယ်ဘက်အင်္ကျီအိတ်ကပ်ထဲတွင် ထည့်ယူလာခဲ့၏။
မင်းဖို့ မုန့်ဖိုးပေးတာတဲ့ဟု အမေက မတိုးမကျယ်ပြောသည်။ သူ့ဘယ်ဘက်အင်္ကျီ အိတ်ကပ်တွင် ငွေစက္ကူတွေထပ်နေသည်။ နှစ်ဆယ် တန်တွေချည်းပဲသားရဲ့ဟု ရွှေများအိနေသည့် မိန်းမကြီးက အလွန်ကြင် နာတတ်စွာပြောသည်။ အားဟု သူအော်မိသည်။ ပါးစပ်မှာ ကောင်း ကောင်းဟ၍မရ။ ညာဘက်ပါးပြင်သည် ယောင်နေ၏။ နာသလား ငါ့သားဟု အမေကပြောရင်း အိုဗာတင်းပါသည့် ကြွေပန်းကန်လုံးကို စားပွဲပေါ်ပြန်တင်သည်။ အမေ့ပခုံးကတစ်ဘက်နှင့် သူ့ပါးကို ကြက်ပူထိုး ပေးသည်။ ရွှေများအိနေသည့် မိန်းမကြီးနှင့် သူမသိသော အသားဖြူဖြူ လူများက ဆရာဝန်ပြန်ခေါ်ရင် ကောင်းမလားဟု ပြောဆိုနေကြသည်။ သူတို့သည် မိသားစုတစ်ခုတည်းကပဲဖြစ်မည်ဟု သူတွေး၏။
အမေ – ဖယောင်းတိုင် ဘယ်သူဝယ်မှာလဲဟု သူမေးသည်။ မင့်မမကြီးဝယ်မှာပေ့ါ။ ငြိမ်ငြိမ်နေငါ့သားဟု အမေကသူ့အား မျက်ရိပ်မျက် ကဲပြကာဆို၏။ မမကြီးသည် အသက်တစ်ဆယ့်ခုနစ်နှစ်ပြည့်ပြီဟု တလောက အမေပြောဖူးသည်။ မမကြီးသည် တစ်နေ့က အနောက်ဘက် က လူတစ်ယောက်နှင့်တွဲ၍ အလည်ထွက်သွားတာမြင်သည်။ မမကြီး ထက်နည်းနည်းတော့ အသက်ကြီးမည်ထင်၏။ အဲဒီလူက စီးကရက်တွေ သိပ်သောက်သည်။ မမကြီးက အလုပ်လုပ်ရသည့်ငွေကို အမေ့ဆီ အမြဲချန်အပ်တတ်လာသည်ကို သူသိသည်။ မမကြီးစုသည့်ပိုက်ဆံများက ဟိုလူ့စီးကရက်ဖိုးတွေလား။ အဖေက အဲဒါကို မသိသလို၊ သိသလိုနေ၏။ ဟိုလူက နည်းနည်းလေးပိုက်ဆံရှိသည်ကို အဖေက ဘယ်လိုတွက်လို့လဲ။ မမငယ်က အမြဲဗီဒီယိုကြည့်တာပဲ။ အမေပြောလည်း ခဏ။ မမငယ်က တစ်လောက အမေ့ကို ရွှေဆွဲကြိုးပူဆာသေးသည်။ အမေက စိတ်မ ကောင်းစွာနဲ့ဆိုသည်။ ညည်းအဖေအလုပ်က အေးနေသေးသည်ဟု ပြောသည်။ ညည်းလည်း အလုပ်ကြိုးစားလုပ်ပေ့ါ။ ဒီတစ်ခါတော့ အမေတကယ်စုပေးပါမယ်ကွယ် ဟု ပြောသည်။ ငွေစုပါက မမငယ် နှစ်နှစ်လောက်စုမှ ရွှေကြိုးတစ်ကုံးရမည်ဟု သူသိ၏။
ပန်းသီးတွေ ထည့်ယူသွား။ အိုဗာတင်းဘူးလည်း မမေ့နဲ့နော်ဟု ရွှေများအိနေသည့် မိန်းမကြီးကပြောနေသည်။ သူ၏ခေါင်းမှာ ရောင်ရမ်း နေသည်ထင်ရ၏။ သူ့ညာလက်မှာ လှုပ်ရှား၍မရပေ။ သူ မှေးကနဲ ဖြစ်သွားသည်။
သူသတိဝင်လာတော့ သူအိပ်နေကျ ကြမ်းပြင်မာမာ ခုတင်ပေါ် သူရောက်နေပြန်၏။ သူ၏ ညာဘက်ပါးပြင်နှင့် နဖူးသည် စပ်ဖျဉ်းဖျဉ်း နာကျင်လျက်ရှိသည်။ မျက်လုံးကို အားယူဖွင့်ကြည့်တော့ ၀ါကျင့်ကျင့် ဖယောင်းတိုင်မီး နှစ်ခုကို သူမြင်ရ၏။ ချက်ချင်းပြန်မှိတ်လိုက်ရသည်။ သို့တိုင် မီးရောင်သည် အနီတစ်လှည့်၊ အ၀ါတစ်လှည့်ဖြင့် သူ့အာရုံထဲတွင် စူးစူးရှရှ လွင့်မျောနေ၏။ သူတဖြည်းဖြည်းချင်း မျက်လုံးများကို မှေးဖွင့်၏။ သူ့အနားတွင် အမေနှင့်အဖေ။ ပြီးတော့ အစ်မနှစ်ယောက် အရပ်ထဲက မိန်းမကြီးလေးငါးယောက်နှင့် ကလေးများ။ ကံသီလို့ပေါ့အေ၊ မသေ ကောင်းမပျောက်ကောင်းဟု ဆံပင်ဖြူဖြူခါးကုန်းကုန်း အဘွားကြီးတစ်ဦး ကရေရွတ်၏။ နဖူးက လေးချက်ချုပ်လိုက်ရတယ်ဟု အမေက သူတို့ အား လှည့်ပြော၏။ အမေ့အနားက ကြောင်အိမ်ဟောင်းလေးပေါ်မှာတော့ အိုဗာတင်းဘူးလေးနှင့် ပန်းသီးများ၊ ဖယောင်းတိုင်မီး၏ အရောင်သည် အသားကျလာ၏။ လမ်းကူးတာဂရုစိုက်ပေါ့။ ခေတ်ကာလ သိပ်မကောင်း ဘူး။ ကားသရဲ၊ ဆိုင်ကယ်သရဲတွေက ပေါလိုက်တာဟု ဆံပင်ဖြူဖြူ၊ ခါးကုန်းကုန်း အဘွားကြီးကပြောသည်။
လမ်းမှားတာက ကလေးက မှားတာတဲ့။ ကားမောင်းတဲ့ကောင် လေးက မွန်မွန်ရည်ရည်နဲ့ပြောတယ်ဟု အမေကဖောက်သည်ချနေသည်။ ကောင်လေးက သဘောကောင်းပါတယ်။ တစ်အိမ်လုံးကလည်း သူ့ကို လိုလေသေးမရှိဘူးဟု အမေက ကြည်လင်စွာပြောသည်။ သူကလည်း ခပ်ငေးငေးရယ်။ သူကမှားတာနေမှာပေါ့။ ဖယောင်းတိုင်ထုပ် အ၀ယ်ခိုင်း လိုက်တာလေ။ မီးကပျက်ရက် မဟုတ်လားဟု အမေက အဘွားကြီးကို ပြောနေသည်။ မီးကလည်းတစ်ရက်ခြားတဲ့အေ၊ ညည်းတို့ခေတ်ကာလများ မလဲဟု ဆံပင်ဖြူဖြူ ခါးကုန်းကုန်းအဘွားကြီးကပြောသည်။ ကံပဲပေ့ါ အမေရယ်ဟု သူ့အမေက သူ့အပေါ် စောင်လေးဆွဲတင်ပေးရင်းဆိုသည်။
သူသည် သူတို့အိမ်က အိပ်ရာထဲမှာလှဲနေရသည်။ နေ့လည် စောင်းတုန်းကတော့ ဖယောင်းတိုင်တစ်ထုပ်ဝယ်ရန် လမ်းထိပ်ကဆိုင်ကို သူသွားခဲ့၏။ ဒီနေ့ည မီးပျက်မည်ဟု အဖေကပြောခဲ့သည်။ ထိုစဉ်က ကားဖြူဖြူလေးတစ်စီးသည်လည်း သူဖြတ်တော့မည့်လမ်း၏ ညာဘက် အရပ်မှ ပြေးလာနေခဲ့သည်။ သူ၏အိတ်ထောင်ထဲတွင် ယခု နှစ်ဆယ်တန် တွေ ထပ်နေသည်။ နေ့လည်တုန်းကတော့ သူ့အိတ်ထဲရှိ ဆယ့်ငါးကျပ် တန် တစ်ရွက်နှင့် ကျပ်တန်ငါးရွက်ကို သူ့ဘယ်လက်နှင့် အုပ်ထားခဲ့ရ၏။ သူက ကားလာနေ၍ရပ်နေသည်။ သို့သော် ကားဖြူဖြူလေးက ကြိုးပြတ် လာသော နွားရိုင်းတစ်ကောင်လို လမ်းမပေါ်ဝှေ့ရမ်းပြေးလာ၏။ သူ့ခြေ ရင်း ညာဘက်ယွင်းယွင်းမှ ဖယောင်းတိုင်မီးနှစ်ခုသည် ကားဖြူဖြူလေး၏ ခေါင်းမီးခွက်နှစ်ခုလို သူ့မျက်နှာနှင့်နီးလာသည် သူထင်၏။ သူ့မျက်လုံးများ ကို စုံမှိတ်ထားလိုက်သည်။
ဝုန်းကနဲ အသံကျယ်တစ်ခုကို သူကြားရပြန်၏။ ညည်းကလည်း တောင်းကြီးတစ်လုံးလုံးမှ မမြင်ဘူးလားဟု အမေကအော်ငေါက်သည်။ မမငယ်သည် သူ့ခုတင်နားသို့ ကပ်လာ၏။ ယခု သူ့ခုတင်နားတွင် အမေ၊ အဖေနှင့် မမငယ်မှလွဲ၍ ဘယ်သူမှ မရှိတော့။ ပန်းသီးတွေ အငယ်နှစ်ယောက်စားချင်ရင် တစ်လုံးစီကျွေးလိုက်၊ အိုဗာတင်းတော့ မနက်ကျမှ ရေနွေးနဲ့ဖျောက်သောက်ရအောင်ဟု အဖေက ပြောနေသည်။ အေးပါသမီးရယ်၊ ညည်းအဖေဖို့ တရုတ်စက်ဘီးကလေးတစ်စီးရယ်၊ ညည်းတို့နှစ်ယောက်ဖို့ တစ်မတ်သားကြိုးလေးနှစ်ကုံးရယ်၊ မောင်လေးတွေ ဖို့ အ၀တ်အစားလေးရယ်၊ နေဦး အစ်ကိုရေ၊ ဟိုဘက်က အ၀ှာ့ဆီက ယူထားတဲ့ ငွေနှစ်ထောင်ဆပ်ဖို့ရယ်ရောနော်ဟု အမေ တိုးတိုးလေး ပြောနေသည်ကို သူကြားနေရသည်။
ထပ်ပြီးပြောဦးမလို့။ ဆေးလည်းကုပေးတယ်။ ငွေလည်းရတယ်  ဆိုတော့ အမှုဖွင့်ရင် ရုံးကနားသွားရလာရနဲ့  အလုပ်ပျက်တယ်လေ။ ဒဏ်ရာကလည်း သိပ်ကြီးကျယ်တာမှတ်လို့နော်ဟု အမေက အဖေ့နားကပ် ပြောနေသည်။ အဖေက သူ့အား ကရုဏာသက်စွာ စိုက်ကြည့်နေ၏။ သူ၏ ညာဘက်ပါးပြင်နှင့် နဖူးသည် စပ်ဖျဉ်းနာကျင်နေဆဲရှိ၏။ သူတို့များ ချမ်းသာလိုက်တာ အစ်ကိုရယ်၊ ငွေသုံးသောင်းကို ရက်ရက်ရောရော ဟူသော အမေ့အသံကို သူကြားရပြန်သည်။ ဖယောင်းတိုင်မီး ငြိမ်းတော့ မယ်ဟု မမကြီး၏အသံက အဖေနှင့်အမေကြားက ဖြတ်ပေါ်လာ၏။ အသစ်လဲညှိလိုက်လေဟု အမေက ပြောနေ၏။ ပန်းသီးတွေကို ကိုကိုကြီး ဖို့ချန်ဦးနော်ဟု အဖေကနောက်ဖေးကို လှမ်းအော်နေသည်။ နေ့လည်ခင်း တုန်းကတော့ သူ၏အဖေသည် သူ့အား ဖယောင်းတိုင်တစ်ထုပ်ဝယ်ရန် ငွေနှစ်ဆယ်ပေးခဲ့၏။    ။
နေထွတ်

——————————-

ရွှေအမြူတေမဂ္ဂဇင်း။ အမှတ် ၇၈၊ ဧပြီလ၊ ၁၉၉၆။

ခံစားသူအကြိုက်ဝတ္ထုတိုများ (ပထမတွဲ)။ ၁၉၉၆။

Advertisement